Gleðilegt sumar:)

Já, það er komið sumar, í tilefni af því tók ég niður jólaseríuna úr stofuglugganum í gær:)  Annars áttum við mjög góðan dag í gær, veðrið var yndislegt, hefði mátt vera aðeins hlýrra, en ekki hægt að kvarta yfir því samt.  Við skunduðum á sumardaghátíð í Miðbergi, þar var ýmislegt um að vera.  Meðal annars var söngatriði frá fríststundaheimilunum, Katla var þar í hópnum.  Þau tóku Eurovisionlagið og gerðu það mjög vel, eða eins og kynnirinn sagði, Eiríkur Hauksson hvað!  Svo voru grillaðar pylsur, andlitsmálun og fleiri skemmtiatriði.  Við röltum svo heim og sóttum bílinn, kíktum í smá bíltúr niður í bæ.  Ætluðum svo að kíkja til Bjarna og Erlu, en þau voru þá nýkomin til Bjarna og Xuan, þannig að við fórum þangað og stoppuðum í smástund og krakkarnir léku sér úti í garði.  Við buðum svo Bjarna, Erlu og strákunum í mat um kvöldið, þannig að við komum við í Bónus á leiðinni heim og keyptum kjúkling á grillið.   Sæbi fúgaði svo eldhúsflísarnar, náði reyndar ekki alveg að klára….þar sem að við gerðum smá tæknileg mistök við að blanda fúguna í fyrstu tilraun…*hóst*….en við ætlum að kaupa meiri fúgu í dag, þannig að við ættum að geta klárað þetta í kvöld. 

Ég var í byrja í smá átaki varðandi mataræði og hreyfingu.  Skráði mig á þessa síðu hér sem er alveg bráðsniðug.  Auðvelt að setja sér markmið og fylgjast með árangrinum, ég fæ hugmyndir að æfingum og ýmsan fróðleik sendan í tölvupósti.  Einnig er hægt að fá tillögur að matseðlum og ýmislegt fleira.  Þarna er líka boðið upp á allskyns spjallgrúppur, og þú getur búið til þína eigin heimasíðu, þar sem þú skráir ýmsar upplýsingar um þig og þín markmið.  Mæli með þessari.  Ef einhver vill vera „memm“ þá endilega látið mig vita, þá get ég bætt ykkur við sem vini:)  Ég var hrikalega dugleg áðan (að mínu mati), gerði 50 magaæfingar og sippaði í smástund….komst að því að ég er í enn verra formi en ég hélt…. var gjörsamlega að kafna eftir að sippa hratt 40 sinnum……en nú skal það breytast!

Við Hekla erum í fríi í dag, það er starfsdagur hjá dagforeldrum þannig að við erum búnar að hafa það mjög náðugt….fórum reyndar á fætur í morgun og keyrðum Sæba í vinnuna þar sem að ég þurfti aðeins að stússast í morgun.  Annars erum við bara búnar að vera heima í dag.  Hún sefur úti í vagni eins og er og Katla var að koma heim úr skólanum.  Við ætlum svo að skreppa út í búð á eftir og versla í matinn.  Mamma og pabbi eru svo að koma í kvöld…þau ætluðu ekki að koma fyrr en á morgun, en þar sem veðurspáin fyrir morgundaginn er frekar leiðinleg þá ákváðu þau að drífa sig af stað.  Og við kvörtum nú ekki yfir því að fá þau degi fyrr:) 

Auglýsingar

Gleðilega páska!!!

paskar-129.jpgpaskar-128.jpgpaskar-081.jpgpaskar-068.jpg

Hér var farið á fætur eldsnemma í morgun, enda spennan í algleymingi hjá Kötlu að fara að leita að páskaegginu sínu.  Hún faldi eggin okkar Sæba í gærkvöldi og skrifaði svo niður nokkur verkefni sem við áttum að leysa áður en við máttum byrja að leita að eggjunum.  Við földum egg stelpnanna þegar þær voru sofnaðar og útbjuggum nokkrar vísbendingar fyrir Kötlu sem við földum svo á ýmsum stöðum.  Hún var nú orðin pínu óþolinmóð í restina, hehe, en fannst þetta mjög skemmtilegt.  Við fengum nú bara mjög venjulega málshætti í ár….annað en oft áður:)

Rakel: Penninn er máttugri en sverðið

Sæbi: Að leyna fundi er að líkjast þjóf

Katla: Eigi fellur tré við fyrsta högg

Hekla: Oftast rénar reiðin í biðum

Óskum öllum gleðilegra páska!

Sorgleg staðreynd!!!

Já, því miður er þetta staðreynd.  Valmenn koma ekki til með að spila í Iceland Express deildinni á næsta tímabili.  Ég komst reyndar ekki á leikinn, en fylgdist með gangi mála í gegnum textavarpið.  Mér leið nú bara skelfilega illa þegar ég sá hvert stefndi…þannig að ég get rétt reynt að ímynda mér líðanina hjá Sæba.  En eins svekkjandi og þetta er nú þá er víst ekkert hægt að gera nema sætta sig við orðinn hlut.   Komin í langþráð páskafrí, ekkert sérstakt planað hjá okkur þannig lagað…..nema að eiga góðar stundir saman og fjölskyldast.  Vona að það viðri vel fyrir sundferðir og göngutúra….keyptum okkur flísar í eldhúsið um daginn…reynum kannski að pota þeim upp…og svo bíða páskaeggin þess að verða étin:)