Ég hef ekki alveg verið að standa mig í blogginu a…

Ég hef ekki alveg verið að standa mig í blogginu að undanförnu, enda svosem nóg að gera. Ég lenti í frekar óskemmtilegu í morgun þegar ég í sakleysi mínu hellti seríósi útá ab-mjólkina mína eins og ég geri reyndar á hverjum morgni, frekar mikið tilbreytingarleysi í morgunmatnum hjá mér þessa dagana. Var þá ekki lítil svört padda innan um seríósið, ekki alveg það sem mig langar til þess að finna í morgunmatnum mínum. Ég er alveg ferlega klígjugjörn og sérvitur í sambandi við mat. Hendi öllu sem er nálgast síðasta söludag, missi matarlystina ef ég finn bein í fisknum mínum os.frv. Ég hef líka verið einstaklega óheppin hvað þetta varðar að undanförnu. Þegar við vorum úti í Danmörku fann ég rauðan maur skríðandi á hrökkbrauðinu mínu *hrollur*, svo um daginn fann ég sprelllifandi og spriklandi græna pöddu í salatinu mínu *ennþá meiri hrollur* og svo þetta atvik í morgun.
Vona að þetta sé þá búið í bili. Ég ákvað að dekra svolítið við sjálfa mig í hádeginu og kíkti á Laugaveginn, ætlaði að fara á Á næstu grösum, en svo lagði ég aðeins of langt frá, því að ég vildi vera viss um að fá stæði. Endaði svo á því að fara inn á Rossopomodoro, því að ég nennti ekki að labba lengra:) Það var líka bara mjög fínt, fékk mér lasagne sem var mjög gott, og líka mjög gott pöddulaust salat með:) Að öðru leyti er bara allt gott að frétta af mér og bumbubúanum, ég er bara farin að þreytast aðeins, vakna líka tvisvar til fjórum sinnum á nóttu til þess að pissa og/eða snúa mér í rúminu, spennandi, en sennilega bara ágætist æfing fyrir það sem koma skal þegar krílið mætir á svæðið:) Svo má ekki gleyma því að ég er farin að labba eins og önd:) En það fylgir þessu nú bara.

Helgin var aldeilis fín. Við fórum í smá búðarlei…

Helgin var aldeilis fín. Við fórum í smá búðarleiðangur á laugardaginn. Kíktum í smáralindina og keyptum smá verðlaun handa Kötlu af því að hún er búin að vera svo dugleg að sofa í sínu rúmi að undanförnu. Hún kom nefnilega alltaf uppí til okkar á hverri einustu nóttu, þannig að það var frekar þröngt um okkur. Við vorum búin að reyna áður að hafa verðlaunakerfi fyrir hana, þá fékk hún límmiða fyrir hverja nótt sem hún svaf í rúminu sínu og fékk svo verðlaun þegar hún var komin með 5 eða 10 límmiða. Það virkaði ekki alveg nógu vel því að um leið og hún var búin að fá verðlaunin þá fór hún aftur að koma uppí:) Um daginn sá hún þessa fínu prinsessuvekjaraklukku í Hagkaup sem hana langaði mikið í. Hún fékk að kaupa hana með því skilyrði að hún myndi þá sofa í sínu rúmi svo að hún gæti vaknað við vekjaraklukkuna sína. Þetta hefur gengið svona glimrandi vel, 7, 9, 13. Hún hefur ekki komið uppí síðan og svo vaknar hún sjálf við vekjaraklukkuna, þannig að við þurfum ekki einu sinni að standa í því að vekja hana á morgnana, sem var nú ekki alltaf auðvelt:) Hún er bara alveg ótrúlega dugleg og fékk þessvegna að velja sér dót í verðlaun. Eftir smáralindina þá sóttum við Sóley og kíktum með henni í Tæknival þar sem við versluðum okkur eitt stykki prentara og mús. Fórum svo í Blómaval og röltum þar aðeins um. Svo í gær þá fórum við og Sóley í bæinn í tilefni að sjómannadeginum. Katla fór í hoppukastala og við skoðuðum fiskana sem voru til sýnis, röltum í gegnum kolaportið og hittum svo Tedda sem var eitthvað að björgunarsveitast. Við tókum því svo bara rólega þegar við komum heim í gær og horfðum á Back to the future 2, alltaf jafn skemmtilegar þessar myndir. Var frekar skondið þar sem átti að vera árið 2015 með fljúgandi bílum, mini matur sem stækkaði í sérstökum ofni, sjálfreimandi skór ofl. hehe…sé ekki alveg fyrir mér að þetta verði svona eftir 10 ár:)